ہجرت کی تلخ یادیں۔

 

ہجرت کی تلخ یادیں

یہ بات ہے 1956 کی جب ہجرت پر مستقل پابندی لگ چکی تھی اور ابھی ہندوستان کے بہت سے مسلمان  پاکستان  آنا چاہتے تھے۔خاص طور پر حیدرآباد  دکّن پر ہندوستان کا قبضہ ہونے کے بعد وہاں کے مسلمان پاکستان آنا چاہتے تھے۔ بھارت حیدراباد دکن پر فوج کشی کر کے قبضہ کر چکا تھا۔

ہم اس وقت حیدرآباد دکن  میں تھے اور والد صاحب وہاں محکمہ کوآپریٹو سوسایٹیز میں آفیسر تھےقبضہ کے بعد حیدرآباد  دکّن میں عازمِ پاکستان ہونا جرم تھا۔

والد صاحب نےپاکستان جانے کا خفیہ پروگرام بنایا اور ہجرت سے قبل الگ الگ  دو چپڑاسیوں کو سامان دے کر آگے روانہ کیا کہ وہ کلکتّہ سامان پہنچائیں گے پھر ہم وہاں سے مشرقی پاکستان چلے جائیں گے۔ان میں سے ایک تو سامان لے کر بھاگ گیا اور پھر کبھی نہ ملا اور دوسرا کلکتّہ سامان لے کر پہنچ گیا۔

اب گھر سے چھپ کر نکلنا تھاکیونکہ ہر مسلمان مشکوک تھا۔معمول کے مطابق دودھ گوشت سبزی  صبح خریدی گئی ۔دن گذارا  شام کو  پلنگوں پر  رات کے بستر لگائے گئے مچھر دانیاں تانی گئیں ،نوکرانیوں کو رات کا کھانا پکانے کی ہدایت کی  کہ کوئی  بات خلافِ معمول نہ ہو ۔کلب جانے کے لئے تانگے میں بیٹھے۔

’’ امّی میں نے کل جو گیند لی تھی وہ گھر میں رہ گئی ہے تانگہ روکیں میں گیند لے آؤں”۔ گھر والے کس مشکل میں تھےسارا گھر چھوڑکر جا رہے تھے اور اس معصوم کو اپنی گیند کی پڑی تھی۔’’امی یہ تانگہ کدھر جا رہا ہے کلب تو ادھر ہے،ہم کہاں جا رہے ہیں؟” ’’بیٹا پہلے دیوان صاحب کے گھر جائیں گے پھر وہاں سے کلب جائیں گے”

 ایک دیوان صاحب کے گھر اتر گئے۔یہ دیوان صاحب  با اثر آدمی تھے اور والد صاحب کے ہمراز تھے۔دیوان صاحب نے اسمگلر دیئے ۔رات گئے ہم آٹھ  افراد بیل گاڑی میں بھیس بدل کر دیہاتیوں کے حلیے میں روانہ ہوئے،بس اور ٹرینوں  سےپہلی منزل کلکتّہ تھی۔  راستے میں کئی جگہ پولیس کو رشوت دی اور کلکتہ پہنچ گئے۔

 ایک بنگالی چپڑاسی تو سامان سمیت کلکتّہ آ گیا۔ دوسرے   کاتین ہفتے ہوٹل میں انتظار کیا لیکن وہ بیوفائی کر گیا۔والد صاحب کے پاس جو رقم تھی وہ خرچ ہوچکی تھی  ۔جو سامان بِک سکا بیچ کر ہوٹل کا بل دے کر  ضرورت سے کم رقم بچی۔ اب وہ آفیسری کے ٹھاٹھ باٹھ ختم اور ہم حقیقی کسمپرسی والے مہاجر ہو گئے۔ ہندوستان اور مشرقی پاکستان کا  درمیانی  بارڈر پار کرنے کے لئے  ہی ان سمگلروں کی خدمات حاصل کی تھیں۔وہ ہمیں کھیتوں ندی نالوں سے رات  کو سفر کراتے اور دن کو درختوں یا فصلوں میں  چھپا دیتے۔

سخت اندھیرا بارش کیچڑ سردی۔  ندّیوں سے نکلتے ہوئے بھیگنے کی مصیبت جھیلتے ہوئے پیدل پیدل چلتے گئے۔جب کوئئ ندّی پار کرنی ہوتی تو  دو تین کلو میٹر اوپر یا نیچے جانا پڑتا پھر کیچڑ سے گزر کر ندّی پار کرتے ۔بعض ندّیوں پر ڈونگا نام کی پیالہ نما کشتی سے پار ہوتے ۔یہ بانس کی بنی ہوئی بالکل پیالے جیسی دس فٹ قطر کی ایسی گول کشتی ہوتی تھی جس کو بانسوں کے بنے چھیکے پر بھینسے کی کھال چڑھا کربنایا جاتا تھا اس کی خاصیّت یہ تھی کہ وزن بیچ میں ہونے سے یہ متوازن رہتی ہے اور پوری کی پوری پانی میں ڈوبی ہوتی ہے ،پانی کی سطح سے بس ایک آدھ فٹ اوپر کا حصّہ نظر آتا ہے جو دور سے دکھائی نہیں دیتا ۔

ایک سال سے آٹھ سال کے پانچ بچےّ ، والدین کس مشکل میں مبتلا تھے یہ وہی جان سکتے ہیں۔ یہ پاکستان آنے کی لگن تھی  یا ہندوستان  سے بھاگنے کی فکر۔  ایک جگہ بارڈر پر اندھیرے میں اچانک  پولیس نے ہمیں دیکھ کر روائتی انداز میں جو ہینڈز  اپ، رُکو  خبردار،ہلنا نہیں کا شور مچایا اور سب کو مع سمگلروں کے  پکڑ لیا تو میں  خوف  سےبھاگ کھڑا  ہُوا۔ اندھیرے جنگل میں  بھاگتا چلا گیا اور پولیس کا چِلاّنا روکو پکڑو  امّاں کی آوازیں ہائے میرا بچّہ لیکن میں بھاگتا  ہی چلا گیا  اپنی طرف سے میں اب ا یک درخت کی اوٹ میں چھپ کر محفوظ   ہو گیاتھا لیکن پکڑا گیا دو چار گھونسوں لاتوں کے بعد ایک وردی والے نے مجھے بالوں سے پکڑ کر ایسے کمر پر لادا جیسے شکاری خرگوش کو  اور ایسے لا کر پٹخا  جیسے دھوبی کپڑے پٹختا ہے اماں کو سکون ہُوا ۔

لین دین کے بعد قافلہ روانہ ہُوا  اگلی پولیس چوکی پاکستانی بنگالی مسلمانوں کی تھی  جنہوں نے ہماری حالت دیکھ کر امداد کی اور ایک بنگالی خاندان کی طرف بھیجا ۔ محمّد عالم کا یہ گھر تھا ۔ یہ ایک متوسّط گھرانا تھا جس میں دو بھائی اپنے تیرہ بچوں کے ساتھ رہتے تھے ۔آٹھ چھوٹے بچوں کو رات گزارنے کے لئے ایک بانسوں کے بنے دڑبے میں بھیج دیا جاتا تھا اس دڑبے کے باہر پٹ سن کی بوریوں کی تین چار پرتیں لپیٹی ہوئی تھیں۔اور اندر بھی بہت سی بوریاں اوڑھنے کے لئے پڑی تھیں۔ کہتے ہیں کہ نئی بوریاں پٹ سن کی والدین استعمال کرتے تھے اور جب وہ نرم ہوجاتیں تو بچوں کو استعمال کے لئے سے دی جاتی تھیں۔ دو دن وہاں رُکےکپڑے دھوئے   نہائےایک ہفتے سے تو منہ  بھی نہیں دھلا تھا  ۔ مشرقی پاکستان  میں ڈھاکہ سے بجرے میں چاٹگام آ کر  بحری جہاز کے ذریعے سیلون  آئے۔ یہاں ہمارا بحری جہاز ایک بحری کرین سے ٹکرا گیا تھا جس سے ہم سب گر پڑے تھے۔یہ جہاز چھوڑنا پڑا اورایک دن بعددوسرے بحری جہاز سے کراچی مغربی پاکستان منتقل ہو گئے۔

ہمارےساتھ جو بنگالی چپڑاسی تھا وہ بھی پاکستان آنا چاہتا تھا۔ اس کے پاس کرایہ نہیں تھا اور ابا کے پاس بھی اس کا کرایہ نہیں تھا۔وہ کسی نہ کسی طرح جہاز میں چڑھ گیا بنگالی تھا، شائد قلی یا مزدور کے بھیس میں چڑھ گیا۔اب اسے کراچی میں اترنا تھا وہ ہمیں سلام کر کے   جہاز سے کود کر تیرتا ہوا نجانے کدھر کنارے لگا۔ہم کراچی سٹیشن آگئے ۔بس اتنا معلوم تھا کہ نانا نانی خانیوال میں ہیں۔وہاں جانا تھا۔کسی نے ہمیں سٹیشن پر   دیکھا اور جیکب لائنز میں ابا کے بھائیوں کو اطلاع دے دی۔ وہ آئے اور ہم سب کو  ٹرین سے اتار کر جیکب لائنز لے آئے۔ ہم اپنوں میں آگئے۔یوں ہماری ہجرت مکمل ہوئی۔

ہندوستان میں بچپن کی یادیں

 

ہندوستان

کچھ کچھ یاد آتا ہے کہ ایک ندی تھی اس میں کچھ پانی چل رہا ہوتا تھا۔ یہ عالم پور تھا ۔میں اپنے دوستوں ہسنو ،میاں جانی اور بابو جانی کے ساتھ اس ندی پر جاتا اس کی پلیا کے پاس ایک مچھیرا جال مارتا تھا جس میں بہت ساری چھوٹی چھوٹی مچھلیاں آجاتی تھیں جن کو میں دیکھتا رہتا تھا ۔ کچھ  پرندے بھی اس آدمی کے ساتھ ساتھ چلتے جاتے اور اپنا حصہ اس سے لے کر کھاتے رہتے تھے۔ ایک روز ہسنو جب ندی میں پوری طغیانی تھی پلیا سے ندی میں گر گیا۔دونوں جانی ہم سے بڑے تھے کسی ایک نے ایک دم ہاتھ مار کر اسے بالوں سے پکڑ لیا اور پھر ہمارا ندی پر جانا بند ہو گیا۔بابو جانی اور  میاں جانی اتنے بڑے تھے کہ بعد میں ابا جان کی ان سے خط و کتابت رہی وہ اپنی تعلیمی سرگرمیاں ابا کو پاکستان میں خطوط سے بتاتے رہے۔پھر زمانے کی بھول بھلیوں میں گم ہو گئے۔ابا جان ان کو باقی زندگی تلاش ہی کرتے رہےپینسٹھ سال بعد ہندوستاں بھی گئے کہ شائد ملاقات ہو جائے لیکن نہ ہو سکی ۔ نمعلوم ابا جان کو ان لوگوں سے کتنی محبت تھی کہ ان کے خطوط اور دوسرے دوستوں کے خطوط ساری عمر سنبھال کر رکھے۔اس زمانے سے ہی مجھے مچھلیوں اور ندی نالوں ،دریا ؤں  پرندوں اور قدرتی مناظر سے دلچسپی رہی جو آج تک ہے۔یہاں ایک دریا بھی تھا جس کا نام دریائے برہم پتر تھایایہ اس کی کوئی شاخ رہی ہوگی کیونکہ کبھی اس میں زیادہ پانی نہیں دیکھا۔میں اس وقت اتنا چھوٹا تھا کہ پانی میں نہیں جاتا تھا ۔میرے ساتھی اپنے کپڑےمیرے پاس رکھوا کر  پانی میں نہانے چلے جاتے تھے۔ایک بار سب کے کپڑے گم ہو گئے تھے جس پر مجھے خوب ڈانٹ بھی پڑی تھی۔یہاں ابا جان کے ساتھ پکنک منانے بھی  آجاتے تھے۔ایک جانب سے اباجان اور دوسری جانب سے میں دوپٹہ پکڑ کر مچھلیاں پکڑتے تھے۔ اس میں ننھی ننھی مچھلیاں آجاتی تھیں جن کو ہم لوٹے یا شائد کسی برتن میں رکھ لیتے تھے۔اس دوپٹے میں جو پانی کے قطرے نیچے گرتے تھے وہ ستاروں کی مانند  چمکتے بہت بھلے لگتے تھے ۔اب تک وہ سین یاد ہیں۔یہاں ابا کی محبت بھی یاد آتی ہے کہ کس طرح وہ بچوں کے ساتھ بچہ بن کر اتنی چھوٹی چھوٹی مچھلیاں پکڑتے تھے۔یہ عالم پور کہاں تھا اب معلوم نہیں ۔

یہاں سے کچھ دور  دریا کے کنارے ایک مندر تھا۔اس پر   ایک میلہ بھی  دیکھا تھا۔میلہ تھا  یا ہندووں کی کوئی پوجا تھی۔اس میں بہت کچھ ہوگا لیکن جو مجھے یاد رہ گیا ہے وہ  یہ ہے کہ بہت سارے لوگ تھے۔دریا میں اور اس کے کنارے ان کے مہا پجاری یا سنیاسی یا جوگی وغیرہ اپنا کمال دکھا رہے تھے۔ ایک ببول کے کانٹوں کے کوئی تین فٹ موٹے بستر پر لیٹا تھا۔یہ کانٹے لمبے لمبے اور نوکدار تھے۔بستر کشتی نما تھا۔وہ اس پر ننگ دھڑنگ لیٹا تھا اور لوگ اس کے پاس رکھے کشکول میں  سکے ڈال رہے تھے ۔ ایک موٹا سا آدمی اپنا ایک ہاتھ اوپر اٹھائے ہوئے تھا۔یہ ہاتھ نمعلوم کتنے سال سے اوپر تھا کہ سوکھ  چکا تھا اور اس پر کوئی نو دس انچ لمبے ٹیڑھے میڑھے  ناخن بھی تھے۔ایک صاحب مادر زاد ننگے کھڑے تھے ان کے پیر بہت موٹے تھے ایسے جیسے جاپانی پہلوانوں کے ہوتے ہیں۔ وہ ٹانگیں چوڑی کر کے کھڑے تھے ۔انہوں نے اپنی پیشاب کی جگہ پر ایک سونے کا تالا بڑی بالی نما پرویا ہوا تھا۔ہندو عورتیں ان کے پاس اپنے بچوں کو لا رہی تھیں۔ایک پیالے میں دودھ لے کر اس پر ڈالتیں اور دوسرا پیالہ جو نیچے لگایا ہوا تھا اس میں وہ دودھ اکٹھا کر کے  بچوں کو پلا رہی تھیں۔ایک رشی مٹی میں مکمل دبے ہوئے تھے اور ان کے صرف ہاتھ باہر تھے جن کے پاس کشکول پڑا تھا۔اللہ جانے سانس کہاں سے لے رہےتھے۔یہ تو مذہبی قسم کے لوگ تھے۔اس کے علاوہ نٹ کا تماشہ دکھانے والے بھی تھے جو بانسوں پر چڑھ کر طرح طرح کے کرتب دکھا رہے تھے۔رسّوں پر چل رہے تھے۔بندر وں کی دو پہیوں کی چھوٹی سی  گاڑی تھی جس میں  چھوٹے بچوں کو بٹھا کر سیر کرا رہے تھے۔کئی بندر اس میں جوتےہوئے تھے۔ ہم تین بھائیوں میں سے صرف میں نے اس بندر گاڑی کی سواری کی باقی دونوں بندروں سے ڈر گئے تھے۔

حیدرآباد دکن کا اتنا یاد ہے کہ بڑی کوٹھی تھی نوکر چاکر اباجان کی افسری اور کلب جانا۔ہمیں اچھے بڑے ہونے کے باوجود  نوکر چاکر گود میں لے کر کلب جاتے تھے۔امی کلب میں ٹینس اور تاش کھیلتی تھیں۔گھر میں بڑا سا صحن سیڑھیوں   پر  چڑھنے کے بعد بڑا سا دالان ، گھر میں ہذامن فضلِ ربی کے تحت بہت سے پھل فروٹ ہر وقت بھرے رہتے تھے۔ کیلے کی ڈال اتنی بڑی ہوتی تھی کہ میرے قد سے بڑی۔اس میں کیلے پکتے رہتے اور ہم توڑ کر کھاتے رہتے۔  بہت بڑےسینگوں والےبیل پر رکھی  ایک بڑی مشک میں پانی آتا تھا ۔ شائد یہ مشک گائے کی کھال کی بنی ہوتی تھی۔تمام بچوں بڑوں کی الگ الگ چارپائیوں پر شام کو ہی مچھر دانیاں لگا دی جاتی تھیں۔شام کو ہی صحن میں چھڑکا ؤ کر دیا جاتا تھا۔صحن میں دھان کوٹنے والیاں  آتی تھیں اور بڑی بڑی اوکھلیوں میں دھان ڈال کر بڑےبڑے موصل سے  کوٹتی تھیں۔اس سے دھان سے چاول نکل آتا تھا۔ایک اوکھلی میں دو عورتیں  بڑے اور موٹےموصل مارتی تھیں۔ وہاں کے لوگ  چاول کے عادی تھے اور ہم لوگ آٹے کے عادی تھے۔امی ان کو چاول دے کر آٹا لے لیا کرتی تھیں۔ایک روز ایک گہرے ہرے  رنگ کا سیاہی مائل بچھو کسی نے مارا ہوا تھا اور صاحب یعنی ہمارے کے گھر لایا تھا۔یہ بچھو چپل کے جتنا بڑا تھا ۔امی نے اس کا نام چپل بچھو بتایا تھا۔لوگوں کے کہنے کے مطابق جس کو یہ بچھو کاٹ لے وہ مر جاتا ہے۔واللہ عالم۔

شمیم غوری کے لیپ ٹاپ سے ایک تحریر

کہانی دیسی ککڑ کی

کہانی دیسی ککڑ کی

            ہوا یوں کہ ہم دس دوست دو گاڑیوں میں  بلوچستان کے ایک خوبصورت علاقے کنڈ ملیر میں مچھلی کا  شکار کھیلنے گئے۔سارے شکارکا بندوبست حاجی  لّلو پہلوان کے ذمہ تھا ۔جس کے ابا  پہلے انڈیا میں پھر کراچی میں  ڈاکو تھے۔ایک رات کی کیمپنگ تھی۔ رات سے پہلے ہی پانچ افراد کہنے لگے ہمیں واپس جانا ہے۔تین  دیسی ککڑ  چولہے پر تھے۔ یہ فرمائش خاص طور پر ملّا حجتی کی تھی۔ورنہ ہماری پارٹی سمندر پر سی فوڈ ہی پسند کرتی ہے۔شام ہو رہی تھی۔ککڑ کا مصالحہ غلط تھا یا ہم اناڑی تھے یا ککڑ کسی احتجاج پر تھے اس لئےگلنے کو تیار نہ تھے۔حاجی للّو  پہلوان کا کہنا تھا کہ بس مغرب سے پہلے تیار ہو جائیں گے۔لیکن یہ افراد واپس جانے کے لئے اپنا سامان باندھنے لگے۔مغرب قریب تھی۔ حاجی لّلو نے بہت کہا کہ بس تیارہیں  لیکن   یہ لوگ سڑک سے  نیچے اترنے  کو تیار نہیں ہوئے ۔تھوڑا مشکل  راستہ  تھا۔مّلا حجتی کا رکنے کا ارادہ تھا سب کو اس نے کہا بھی کہ ککڑ کھا کر چلتے ہیں لیکن سب کو جلدی تھی۔ملاّ حجتی کو ککڑ روکتا تھا لیکن  میں نے کہا جو جس گاڑی میں آیا ہے اسی میں جائے  میری گاڑی میں جگہ نہیں ہے۔ آخر یہ لوگ  واپس چل دئیے۔بعد میں پتہ چلا کہ دو افراد تو گھر میں بتاکرہی نہیں آئے تھے۔اور ایک بیچارہ بیوی زدہ ہے۔ اس لئے رات کو نہیں رکے ۔ ان کی روانگی سے پہلے ککڑ گل کر تیار ہوگئے تھے۔یہ تین  فربہ دیسی  ککڑ ہم پانچ افراد نے دو وقت کھائے لیکن پھر بھی  بانٹنے پڑے۔چندے میں سب کے پیسے تھے ان میں بیچارہ  ملّا حجتی بھی  تھا۔

            جب سب واپس آگئے تو ملاّ حجتی نے مطالبہ کر دیا کہ ہم نے مرغا نہیں کھایا۔پیسے واپس دو یا کسی پروگرا م میں مرغا کھلاؤ۔اب جب  بھی شکار کا چھوٹا موٹا پروگرام گڈانی کا بنتا۔جس میں  حاجی للوّ  پہلوان مرکزی کردار ہوتے ہیں  انہیں ّملا حجتی کہتا کہ دیسی مرغا پکاؤ۔پارٹی کے دوسرے ممبر کہتے کہ بھئی چندہ کر لو اور پکا لو۔پارٹی میں دو افراد تو ویسے ہی مفت والے ہوتے  ہیں۔دونوں غریب اور کمزور  ہیں انہیں زبردستی لاتے ہیں۔۔یہ پرانے ساتھی ہیں کام بھی کر دیتے ہیں اور شکار بھی اچھا کرتے ہیں۔ایک سفید پوش ہے جو  بس گزارہ کرتا ہے۔اب پانچ آدمیوں میں بس تین ہی مرچ مسالوں  اور چاول روٹی میں چندہ ڈال کر کھانے والے رہ گئے۔ان میں ملّا حجتی کہیں کہ  میرا تو مرغا ادھار ہے۔ حاجی للّو کہیں کہ مرغا ریڈ میٹ ہے۔میں بیماری خرید کر نہیں کھاتا۔مفت کی کھا لیتا ہوں۔ اب ملاّ حجتی نے مجھے کہا کہ  دیسی ککڑ  میں شامل ہوجاؤ میں نے کہا ٹھیک ہے۔میرا خیال تھا کہ تین چار آدمیوں میں میں بھی شامل ہوجاتا ہوں۔میں کبھی کبھار  ان لوگوں کی شکار پارٹی میں  بطور مہمان چلا جاتا ہوں کچھ کولڈ ڈرنک  تازہ روٹیاں وغیرہ یا پھل لے جاتا ہوں۔جب انہوں نے مرغا خریدتے وقت مجھے بتایا کہ بس  آپ ہی ا س میں شامل ہیں اور کوئی پیسے نہیں دے رہا تو میں نے انکار کردیا۔اب یہ قصہ سال بھر چلتا رہا کبھی ککڑاس کی گردن پر تو کبھی اس کی گردن پر۔لیکن  دیسی ککڑ کسی کی گردن پر فٹ نہیں ہوا۔ اس دوران رشید  صاحب بھی میرے ساتھ بطور مہمان جانے لگے وہ بھی اچھا خاصہ خرچ کر دیتے  ہیں۔

            ککڑ ککڑ سن کر  کان پک گئے تھے۔ملا حجّتی کو بس  دیسی ککڑ کھانا تھا۔ہر وقت ککڑ کے پلان۔ طرح طرح کےپلان اور مشورے۔ایک مشورہ دیا کہ ہر پروگرام میں  سے تھوڑے سے پیسے بچا کر رکھتے جاؤ اور ایک پروگرام میں مرغا کر لو۔پارٹی میں خرچ کرنے والے بھی ایک دو آدمی ایسے تھے جن کے لئے   ایک کیا دس دیسی ککڑ  بھی کوئی بوجھ نہیں ۔لیکن  سب ملا حجّتی سے مزے لے رہے تھے۔ملا حجّتی نے ایک دن پھر مجھے کہا کہ دیسی ککڑکا پلان ہے۔آپ کھائیں گے۔میں نےہاں کردی۔اب کہنے لگے کہ آخری تاریخیں ہیں۔آپ خرچ کر لیں کچھ رشید صاحب کو شامل کر لیں۔میں نے  ساری بات رشید صاحب کو بتائی وہ کہنے لگے بھائی بہت دن ہو گئےسنتے سنتے ملاّ حجتی کو مرغا کھلا ہی دو۔سارا خرچ میں دے دیتا ہوں۔غرض ہم دونوں نے سارا خرچ برداشت کر لیا۔ملّا حجتی ایک بار پہلے بھی حساب کتاب میں  گڑ بڑ کرتے پکڑے گئے تھے اور پارٹی میں کرپشن میں بدنام تھے۔اس بار بھی سب کا متفقہ  خیال  تھا کہ مرغا  خریدنے میں کرپشن کی  ہے واللہ  عالم۔

            ساری پارٹی رات سےگئی ہوئی تھی۔شدید سردی تھی سب کا برا حال ہوا۔کچھ مچھلی لگی اور انہوں  نے پکاکر رات میں کھالی۔میں اور رشید صاحب حسب معمول تازی روٹیاں لے کراگلے دن   دوپہر  میں  پہنچے۔ تھوڑی دیر میں مرغا تیارہو گیا۔زبردست خوشبو آرہی تھی۔ملا حجتی نے تیار کیا تھا۔ مرغا  چولہے سے اتار کر چاول پکانے رکھ دئیے۔انہوں نے سب کو نکال کر دیا ۔کہنے لگے  سب کھا لیں،میں خمیری روٹی نہیں کھاتا چاول سے کھاؤں گا۔سب نے کھایا۔خوب نکال نکال کر دیا۔بقول حاجی  لّلو کے ملاّ حجتی نے رانیں اپنے لئے بچا لیں۔مجھےاور رشید صاحب کو  جلدی آنا تھا۔کھاناہم کھا چکے تھے۔اجازت لی اور چل دئیے۔خوشی ہوئی کہ ملّا حجتی کا ادھار اور خمار اتر گیا۔

            ابھی ہم حب چوکی پہنچے تھے کہ حاجی  لّلو کا فون  آیا۔کہنے لگا۔کہیں رک کر فرصت سے فون کرو۔ ہم چائے پینے رکے اورحاجی   لّلو کو فون کیا۔کہنے لگے۔آپ ادھر گئے، ہم  سب پانی میں شکار کھیلنے چلے گئے،ملا حجتی  چاول دم پر لگا کر ٹہلنے نکلے۔پیچھے سے کتوں نے ہنڈیا گرادی اور کھا گئے۔

            ہائے رے یہ انجام  دیسی ککڑ کا۔اور یہ پشیمانی مّلا حجتی کی۔اب جب بھی دیسی ککڑ کانام آتا ہے ملا حجتی منہ دوسری طرف کر لیتا ہے۔داستان تو منہ سے نکلی کوٹھوں چڑھی۔علاقے کے لوگوں نے اس کا نام ہی ملّا کّکڑ رکھ دیا ہے۔اب تومیدان دور دور تک صاف ہے  دور بین سے بھی کہیں کوئی ککڑ نظر نہیں آرہا۔

اس ساری کہانی کا لب لباب یہ ہے کہ جس نے بھوک کے وقت تیار کھانا ٹھکرایا اس کو کھانے نے بھی ٹھکرایا۔

خوبصورت بلوچستان

حسین  بلوچستان

            اللہ تعالیٰ نے پاکستان کو تمام قسم کے  جغرافیائی حسن سے نوازا ہے۔پاکستان کے شمالی علاقے کسی تعارف کے محتاج نہیں۔ملکی او رغیر ملکی سیاح یہاں کی خوبصورتی دیکھنے کے لئے آتے ہیں۔ اللہ تعالیٰ نے جنوبی پاکستان کو بھی  بے حساب رعنائیوں سے نوازا ہے۔جنوبی پاکستان میں بلوچستان اور سندھ شامل ہیں۔ آج کی تحریربلوچستان  کے لئے ہے۔بلوچستان میں تمام جغرافیائی بناوٹیں موجود ہیں۔ ایک لمبا سمندر جو دریائے حب کے ڈیلٹا سنہرا سے شروع ہوتا ہے اور جیونی سے آگے ایرانی بندر گاہ چاہ بہار سے کچھ پہلے ختم ہوتا ہے۔اس ساحل  کی لمبائی پاکستان کے کل 1046کلو میٹر ساحل  میں سے  720 کلو میٹر  ہے۔گرم پانی کا یہ سمندر اپنے حسن اور خوبصورتی میں دنیا کے کسی بھی سمندر سے  سے کم نہیں۔موسم گرما میں اس کی دُور سے آتی لہریں  اتنا دلچسپ اور خوبصورت منظر پیش کرتی ہیں کہ نگاہیں ان سے ہٹتی ہی نہیں ہیں۔کہیں اونچی کہیں نیچی کہیں بہت اونچی کہیں سے ایکدم نیچی۔ اٹھکیلیاں کرتی یہ لہریں سیاحوں کا دل لبھاتی ہیں۔ سیاحوں  میں  اس وقت  سراسیمگی پھیل جاتی ہے جب کوئی ماہی گیری کی کشتی اچانک لہروں میں غائب ہو جاتی ہے۔لیکن یہ اصل میں اونچی لہروں کے پیچھے ہو کر  نظروں سے اوجھل ہو جاتی ہے۔ بلوچستان  کا سمندر کہیں ریت کے ٹیلوں کے ساتھ ہے جیسے سونمیانی ڈام  کے مناظر ہیں ،کہیں یہ  تمر کے جنگلات کے ساتھ ساتھ ہے جیسے بھڑو سے سرندا وغیرہ،کہیں یہ پہاڑوں کے ساتھ لگا ہوا ہے جیسے ہوڑمارہ اور گوادر وغیرہ کا سمندر۔موسم سرما میں  اس سمندر کا پانی گرم ہوتا ہے۔لہریں نہیں ہوتیں  دور دور تک سیدھا   نیلگوں سمندر  بہترین نظارہ پیش کر رہا ہوتا ہے،جس میں رنگین کشتیاں اس کے حسن کو چار چاند لگا رہی ہوتی ہیں۔دنیا بھر  سے آتے تجارتی  بحری جہاز موسم سرمامیں  بہت دور سے صاف نظر آتے ہیں۔سیاحوں خاص طور پر بچوں کے لئے جو ان کی گنتی کررہے ہوتے ہیں بہت پسندیدہ ہوتا ہے۔

            بلوچستان میں بلوچستان کوسٹل ہائی وے بھی ایک سڑک ہونے کے ساتھ ساتھ  کئی دلچسپ تفریحی مقامات کا مجموعہ  ہے ۔اس کے ارد گرد بیشمار تفریحی اور تاریخی مقامات ہیں۔یہ ہائی وے 653کلو میٹر لمبی ہے جو زیرو پوائنٹ وندر کے بعد سے شروع ہوتی ہے اور ہوڑماڑہ،پسنی،گوادر،جیونی سے ہوتی ہوئی ایران کی سرحد تک جاتی ہے۔اس ہائی وے پر ہنگول نیشنل پارک آتا ہے۔یہ پاکستان کا واحد نیشنل پارک ہے  جس میں جنگل ،پہاڑ، ریگستان،ساحل سمندر،دریا،چٹیل میدان اور ٹیلے شامل ہیں۔اس پارک میں جنگلی حیات کی بہت سے اقسام پائی جاتی ہیں اور سیاحوں کو یہ نظر بھی آتی ہیں ۔یہ پارک ڈسٹرکٹ لسبیلہ،ڈسٹرکٹ آواران اور ڈسٹرکٹ  گوادر کے علاقوں پر مشتمل ہےاس میں سمندر کا علاقہ بھی شامل ہے۔اس میں درندے، چرندے، پرندے،رینگنے والے جانور،چوپائے، ،مچھلیاں ،سمندری جانور شامل ہیں۔بھیڑئے،گیدڑ،لومڑیاں،چیتے،چرخ لکڑ بھگڑ،ہرن آئی بیک،پہاڑی بکرے مار خور اڑیال،مگر مچھ،سبز کچھوے،کئی اقسام کی مچھلیاں،گھونگھے،سیپیاں، خار پشت چیونٹی خور  اور بیسیوں جانور  پائے جاتے ہیں۔مہمان آبی پرندے بھی اس  میں آکر اترتے ہیں۔شکار پر پابندی ہے اور اس پر کافی حد تک عمل بھی ہوتا ہے۔

            اس ہائی وے پر  ہندووں کے دو مقدس مقامات ہیں۔ایک تو نانی ہنگلاج کا مندر ہے  جو  دریائے ہنگول کے کنارے واقع ہے اس کی تاریخ ہزاروں سال پرانی ہے۔آریاؤں کے آنے سے بھی پہلے  دراوڑوں میں جو بھی مذہب رائج تھا ،یہ اس زمانے سے موجود ہے۔سکندراعظم کے ایک جرنیل نے یہاں کے یاتریوں  اور سادھوؤں کا ذکر کیا ہے جو بڑی تعداد میں یہاں عبادت میں مصروف تھے۔اس مندر میں اپنے وقت کے  بڑے بڑے بادشاہ اور وزراء  حاضری دینے   میں بڑا فخر محسوس کرتے تھے۔شاہ عبدالطیف  بھٹاِئی نے بھی یہاں کا دورہ کیا تھا۔ہر سال یہاں لاکھوں ہندو  اندرون ملک اور بیرون ملک سے یاترا کے لئے  آتے ہیں۔ یہ ایک قومی  نہیں بلکہ عالمی ورثہ ہے۔

            بلوچستان کوسٹل ہائی وے پر فور کے مقام سے کچھ آگے ایک مٹی فشاں واقع ہے۔ ۔ یہ ایک تین سو میٹر اونچا قدرتی ٹھنڈا لاوا  اگلنے سے وجود میں آنے والا ایک مٹی فشاں ہے۔بلوچستان میں ایسے بہت سے مٹی فشاں ہیں۔یہ سب سے بڑا ہے اور اسے  ہندو مت میں ایک مقدس مقام حاصل ہے۔ وہ اس کو چندر گپ  کہتے ہیں ۔ہندو کمیونٹی جب نانی ہنگلاج کی یاترا کے لئے  آتی ہے تو یہاں بھی پوجا کرتی ہے۔ اس کے دہانے میں ناریل پھینک کر کوئی رسم ادا کی جاتی ہے۔جغرافیائی بناوٹ کے ایسے شاہکا رپاکستان کے دوسرے صوبوں میں نہیں پائے جاتے۔

            صوبہ بلوچستان  مچھلیوں کی دولت سے مالا مال ہے۔یہاں چھوٹی بڑی ماہی بندر موجود ہیں۔یہ تمام ماہی بندر سیاحت اور  پکنک کے لحاظ سے بہت موزوں ہیں۔ سنہرا،گڈانی،سونمیانی،ڈامب،ہوڑ ماڑہ،طاق بندر،پسنی ،پشکان،گنز،گوادر اور کچھ چھوٹی ماہی بندر اپنی خوبصورتی کے لحاظ سے  قابل دید ہیں۔ان میں سے گڈانی اور سنہرا  کراچی کے شہریوں کے لئے  اچھے پکنک پوائنٹس ہیں جہاں چھٹیوں کے دنوں میں تل دھرنے کو جگہ نہیں ملتی۔ملیر کنڈ میں اب کافی لوگوں کا آنا جانا ہونے لگا ہے۔ملیر کنڈ کراچی سے 200 کلو میٹر پر ایک بہت خوبصورت ساحلی علاقہ ہے۔یہاں اتھلا اور محفوظ سمندر ہے۔موسم گرما کے علاوہ تمام سال بہترین اتھلا ساحل ہوتا ہے۔اس سے ملحقہ علاقے بوجی کوہ،رس میلان،شنب، سپٹ وغیرہ قابل دید مقامات ہیں۔مچھلی کے شوقیہ شکاریوں نے یہ تمام علاقے لوگوں میں متعارف کرائے ہیں۔

            ساحلی علاقوں کے علاوہ بھی بلوچستان میں بہت سے قابل دید  تاریخی ،منفرد،آثارقدیمہ اور مذہبی و رومانوی مقامات ہیں۔بے شمار مقبرے اور زیارتیں  لوگوں کی روحانی تسکین کا باعث ہیں۔ کراچی سے سو کلو میٹر کے فاصلے پر مشہور بزرگ بلاول شاہ نورانی کی درگاہ ہے۔اسی کے نزدیک محبت فقیر کا مزار اور لاہوت لا مکاں  کا متبرک مقام ہے۔سارا سال یہاں زائرین کا میلہ لگا ہوتا ہے۔بلوچستان میں دور دراز مقامات پر درگاہیں اور مزارات ہیں۔ماہی پیر،پیر بمبل،شاہ حسن،آری پیر، دیوانے  شاہ، پیر کنانا، ساندھ فقیر اور دیگر مزارات سے برکتیں اور روحانی فیض حاصل کرنے والوں کا ان جگہوں پر  آنا جانا لگا رہتا ہے۔ یہ درگاہیں زائرین کو  طعام و قیام کی  سہولیات مفت فرہم کرتی ہیں۔جنگل بیابان میں  طعام و قیام مل جانا بہت بڑی سہولت ہے۔

رومانوی کرداروں سسی پنوں  کی آخری آرام گاہ ایک مزار کی صورت میں حب چوکی سے ساکران پھر کچھ آگے جاکر پکی سڑک سے کوئی بیس کلومیٹر بائیں جانب پہاڑوں کے درمیان ایک خوبصورت وادی میں واقع ہے۔سسی کا کنواں بھی ابھی تک موجود ہے اور  خواتین کے لئے ابھی تک پتن کا کام کر رہا ہے۔گاؤں گوٹھوں کی خواتین یہاں آکر  پانی بھرتی ہیں اور  کپڑے دھوتی ہیں۔مشہور  رومانوی کردار شیریں فرہاد  کا مقبرہ بھی  آواران روڈ پر موجود ہے۔یہاں جاتے میں جھاؤ کا لک درّے کی چڑھائی  اور خوبصورتی لاجواب ہے۔ایک ایک حصے کو کیمرے میں قید کرنے کی خواہش ہوتی ہے۔

ماہی پیر کا علاقہ سیاحتی حلقوں میں  شہر روغاں یا شہر غاراں کہلاتا ہے۔ایک چھوٹا سا مزارماہی پیر کا ہے  لیکن یہ علاقہ نامعلوم مخلوق کے بنائے ہوئے پہاڑی غاروں کی وجہ سے دنیا میں ایک انوکھا اور آثارقدیمہ کا  شاہکار ہے۔دو پہاڑیوں  کے درمیان سے گزرنے والے راستے کے اندر مزید تین پہاڑیوں میں پہاڑ کو کھود کر اس میں رہنے کے کمرے بنائے ہوئے ہیں،کمرے کے اندر کمرے اور باہر دالان۔یہ کسی نامعلوم زمانے کی نامعلوم مخلوق کے بنائے ہوئے غار ہیں ۔ان کو حفاظتی لحاظ سے  بہت سوچ سمجھ کر بنایا گیا ہے۔ دو پہاڑیوں  کے درمیان سے گزر کر پوری بستی ہے۔ان پہاڑیوں  میں بنے غاروں سے تیر اندازی یا سنگ باری کر کے  دشمن کی پوری فوج کو روکا جا سکتا ہے۔آندھی بارش طوفان ان غاروں کا کچھ نہیں بگاڑ سکتا ۔ماہرین یا نام  نہاد ماہرین کے مطابق یہ نینڈر تھل دور کے مکانات  ہیں ۔یہ بدھ مذہب کے مونکس کی بھی بستی بتائی جاتی ہے۔کچھ لوگ انہیں  پریوں کا مسکن بتاتے ہیں۔ایسی شاندار اور قیمتی متاع کو ہم نے تباہ ہونے کے لئے چھوڑا ہوا ہے۔ان میں پائے جانے والے خزانے کی تلاش میں مقامی لوگ ان کا فرش کدالوں سے توڑ کر انہیں تباہ کر رہے ہیں۔اب تو ڈیٹیکٹر کا بھی سہارا لیا جا رہا ہے۔اتنے قیمتی ورثے کی حفاظت کا بندوبست کرنے کی ضرورت ہے۔

بلوچستان میں پرانے اور تاریخی شہراپنی پرانی عمارتوں اور   نئی شان و شوکت کے ساتھ موجود ہیں قلعہ سیف اللہ،کوئٹہ کا قلعہ اورقلعہ عبداللہ قابل دید شاندار قلعے ہیں جو ہمارے شاندار ماضی کا حصہ ہیں۔ بہت سے چھوٹے بڑے تاریخی شہر کوئٹہ، قلات ،خضدار،چمن  ،تربت، ژوب، سبی گوادر پسنی اور دیگر شہر  دیکھنے سے تعلق رکھتے ہیں ان میں  تاریخی عمارات  کثیر تعداد میں موجود ہیں اور یہ قابل دید ہیں۔پرانےزمانےکے قبرستان بھی اپنے مکینوں کی کہانیاں سنانےاور دکھانے کے لئے موجود ہیں۔ ۔ ان میں موجود مقابر فنکارانہ صلاحیتوں اور فن تعمیر  کے نادر نمونے ہیں۔چوکنڈی طرز کی قبریں  بلوچستان میں کئی جگہ پاِئی جاتی ہیں۔ ۔ایک قبرستان  حب کے قریب آر سی ڈی ہائی وے پر واقع ہے۔ ایک دریجی کے قریب ہنی دان میں واقع ہے۔لسبیلہ میں بھی ایسی قبریں پائی جاتی ہیں۔ دریائے ہنگول کے قریب بھی چند صحابہ کی ایسی  ہی قبریں  موجود ہیں۔اس کے علاوہ بھی کئی مقامات پر ایسی قبریں موجود ہیں جو ہمارا تاریخی اثاثہ اور  قومی ورثہ ہیں۔دور دراز علاقوں میں ان قبرستانوں کا مکمل سروے تک نہیں ہوا۔لوگوں نے ٹریکٹر اور بلڈوزر چلا چلا کر خزانے کی تلاش میں ان کو مسمار کر دیا ہے اور مسلسل ان کو برباد کیا جا رہا ہے۔

بلوچستان کے پہاڑی علاقے جن میں کوئٹہ چمن زیارت اور دیگر شہر شامل ہیں گرمیوں میں بھی ٹھنڈے ہوتے ہیں۔پورے ملک سے لوگ یہاں کے موسم  کا لطف اٹھانےآتے ہیں۔ غیر ملکی سیاح بھی ان علاقوں کی سیاحت کو آتے ہیں۔زیارت میں ریذیڈنسی ہے جس میں قائد اعظم ^رح نے اپنے آخری ایام بسر کئے تھے۔پیر غائب کی آبشار ایک بہترین سیاحتی مقام ہے۔خضدار کے بزدیک مولا چٹک ایک سارا سال بہنے والی انتہائی خوبصورت آبشار ہے ۔کوئٹہ کے نزدیک حنا جھیل کو تو بلوچستان کی سیاحت میں ایک انتہائی اہم مقام حاصل ہے۔وادیِ بولان کی خوبصورتی تو سیاحوں کو اپنی جانب بار بار بلاتی ہے۔جھل مگسی میں   پیرچتل نورانی کے پانی کی بڑی بڑی مچھلیاں جو  نہانے والے سیاحوں کے ساتھ ساتھ چلتی ہیں،ان کی ٹانگوں میں گھس جاتی ہیں ،بہت اچھا تجربہ ہوتا ہے۔

پاکستان کا سب سے بڑا جزیرہ استولا آئی لیندڈیا جزیرہ ہفت تلار ایک بہترین سیر گاہ ہے۔اس پر پسنی یا گوادر سے لانچ لے کر پہنچا جا سکتا ہے۔یہ ابھی تک انسانی دستبرد سے محفوظ ہے اور  سبز کچھووں اور مہمان پرندوں کی آماجگاہ ہے۔اس کو جنگلی و آبی حیات کے لئے محفوظ علاقہ قرار دے دیا گیا ہے۔اس جزیرے پر کسی زمانے میں سکندرِاعظم کے ایک جرنیل نے قبضہ کر لیا تھا اور آنے جانے والے بحری جہازوں کو لوٹ لیا کرتا تھا۔اس کا بلوچ سرداروں نے  قلع قمع کیا۔

اس ایک چھوٹے سے مضمون میں بلوچستان کے سیاحتی مقامات کا  مختصر سا تعارف بھی مکمل نہیں ہو سکتا۔تفصیلی تعارف کے لئے تو پوری کتاب کی ضرورت ہے۔جنوبی پاکستان کی سیاحت کرتے وقت ایک غلط فہمی بلوچستان کے امن و امان کے بارے میں عام ہے۔لوگوں کا خیال ہے کہ وہاں ہر جگہ بندوق بردار لوگوں کو  اغوا اور قتل کرنے کے لئے تیار بیٹھے ہوتے ہیں۔ایسا ہر گز   ہرگز نہیں ہے۔جو لوگ بلوچوں کے کلچر اور مزاج سے واقف ہیں وہ جانتے ہیں کہ بلوچ اپنے علاقے میں کسی  مسافر یا سیاح کو نقصان نہیں پہنچاتا ۔وہ ہر مسافر  کو مہمان سمجھتا ہے۔مہمان نوازی میں وہ پیش پیش ہوتا ہے۔فیملی والوں  کو نقصان پہنچانا تو دور کی بات ہے،معمولی سی پریشانی بھی نہیں ہونے دیتا۔اس لئے سیاحوں کے لئے بلوچستان ایک محفوظ ترین علاقہ ہے۔راقم جب بلوچستان کا بائیک پر سفر کرتا ہے تو اکیلا میلوں تک بے خوف و خطر  چلا جاتا ہے۔جہاں رات ہوجائے کسی بھی مکان یا جھونپڑی میں جا کر  بتاتا ہے کہ مسافر ہوں تو شب بسری اور طعام کا بندو بست ہو جاتا ہے۔ گرمیوں میں پورا جنوبی پاکستان سوائے پہاڑی علاقوں کوئٹہ قلات ریجن کے گرم ہوتا ہے۔سردیوں میں پورا جنوبی پاکستان دیکھنے اور سیرو سیاحت کے قابل ہوتا ہے۔

شمیم الدین غوری

           

           

           

آدھی صدی پہلےایک خطرناک ایڈونچر

آدھی صدی پہلے ایک خطرناک ایڈونچر

            کہہ سکتے ہیں کہ زمانہ قدیم کی بات ہے۔شائد آدھی صدی اس بات کو گزر گئی ہو گی جب ایوب خان کی حکومت ختم  ہونے والی تھی ملک میں ہڑتالوں احتجاج وغیرہ کی لہر تھی۔سٹار ٹیکسٹائل ملز بند تھی اور ورکرز نے باہر کا گیٹ بند کیا ہوا تھا۔ہم دو دن سے مزدوری کے لئے جارہے تھے اور واپس ناکام آرہے تھے۔قاسم بلوچ نام کا ایک جابر تھا جس کے بڑے بھائی سبزی منڈی میں سوزوکی چلاتے تھے۔اس دور میں یہ ایک اچھی گاڑی ہوتی تھی۔ان کے ہاں پانچ بیٹیوں کے بعد بیٹے نےجنم لیا۔ بڑی خوشیاں منائی گئیں۔جس مزار پر منت مانی تھی اس پر جاکر منت اتارنی تھی۔بلوچوں کے ہاں مزاروں پر بکرے کاٹنے کا رواج ہے ۔مزار بلوچستان میں کہیں واقع تھا۔کچھ چڑھاوا وغیرہ  چڑھانا تھا۔قاسم بلوچ نے مجھے بھی چلنے کی دعوت دے دی۔میرا مزاج تو ویسے ہی اباجان نے آوارہ بنایا تھا ، میں جانے کو دھم سے تیار ہو گیا۔ صبح سویرے  لیمارکیٹ پر جمع ہوئے،سوزوکی میں سو روپے کا پٹرول ڈالا جس سے ٹنکی فل ہو گئی۔اس وقت تک میں نے حب چوکی کا صرف نام ہی سنا تھا۔بلدیہ ٹاؤن میں کتے لوٹتے تھے یا مواچھ گوٹھ والے اس میں اپنے مرے ہوئے گدھے ڈال دیا کرتے تھے۔ مواچھ گوٹھ گدھوں کی افزائش کا علاقہ تھا۔جیسے زچہ بچہ کی اموات اس زمانے میں انسانوں میں زیادہ تھیں ویسے ہی  گدھیوں میں بھی زیادہ تھیں۔اس علاقے میں مردار خور گِدھوں کی تعداد بھی بہت تھی جو  دن رات زچّہ گدھیوں کی موت کی دعا کرتے ہونگے ۔ایک زچہ کے مرنے پر ان کا دو تین دن کا کھانا ہو جاتا تھا۔ ویسے بھی گِدھ دنیا کا صابر ترین جانور ہے۔ بلدیہ ٹا ؤن میں گدِھوں سے  لینڈ مافیا  زمین چھین رہی تھی جس پر وہ پشت ہا پشت سے آباد تھے۔آخر کار گِدھ انسان سے ہار گئے۔بلدیہ ٹاؤن کا ذکر یہاں اس لئے آگیا کہ آر سی ڈی ہائی وے  بن رہی تھی اور ہمیں بلدیہ ٹا ؤن کے کچے راستے سے جانا پڑا۔اس راستے پر پلاٹوں کی گھیرا گھاری کی بنا ء پر ٹیڑھے میڑھے راستے سے گدھی زچّاؤں کی لاشوں  کے پاس سے نسیم زہریلی اور باد سموم سونگھتے ہوئے جانا پڑا۔

            دریائے حب کاپل اس زمانے میں  بس یونہی پل کے نام پر پلیا تھی جو ہر بارش میں یا تو بہہ جاتی یا بند ہو جاتی تھی۔ اس کے نشانات موجودہ پل کے نیچے جھانک کر دیکھے جا سکتے ہیں۔حب چوکی پر چند ہوٹل دکانیں اور ورکشاپ تھے ۔ حب چوکی والے ضروریات کے لئے لیمارکٹ کا رخ کرتے تھے۔چند پان کی دکانیں تھیں جن پر سونف خوشبو کا پان بہت فروخت ہوتا تھا۔حب چوکی کے سیدھے ہاتھ پر باغات تھے جو اب ناپید ہیں۔اونٹوں کے قافلے  گھاس اور جلانے کی لکڑیاں لے کر  حب چوکی کے راستے کراچی کی جانب  رواں دواں رہتے تھے۔ اور واپسی پر راشن لیتے ہوئے آتے۔حب چوکی پہنچ کر آٹھ آنے کے   ہری لال خوشبو کے چار پان بندھوائے  ایک منہ میں ڈالا ۔ چار پر ایک فری تھا۔چھوٹی سی باڈی کی کھلی سوزوکی تھی جس میں دری ڈال کر بیٹھ گئے تھے۔وندر پہنچتے پہنچتے دوپہر ہو گئی۔وندر بھی ایک چھوٹا سا بس اسٹاپ تھا جس پر کھانا مل گیا۔ قاسم کا بھائی  نزدیک ہی منڈی سے ایک بکرا خرید لایا جس کو سوزوکی میں سوار کرا دیا گیا۔ بلدیہ کے گڑھوں اور کچے راستے پر   چلنے سے گاڑی میں چر چوں چرچوں اور کبھی گڑروں گڑروں  کی آوازآنے لگی،جس پر کوئی توجہ نہیں دی۔قاسم کے بھائی نے آوازوں پر کہا کہ ہم تو اس پر بیس من سبزی لے کر جاتا ہوں  یہ چند آدمیوں سے کچھ نہیں بگڑتا اس کا۔ ویسے سڑک  تو ساری  بس واجبی سی ہی تھی جس پر کسی بھی گاڑی کا ہلواڑہ بننا    ہی تھا۔

 اوتھل  سے ہوتے ہوئے بیلہ آئے وہاں سے کچھ آگے سیدھے ہاتھ پر کچا راستہ  شروع ہوا۔ہر تھوڑی دیر بعد ریت میں  میں گاڑی دھنس جاتی اور ہم سب اتر کر  یا علی کہہ کردکھا لگاتے اور گاڑی نکل جاتی۔گرد پہیوں سے اڑ اڑ کر ہمارے چہروں کا  جو دھوپ او رگرمی سے تمتما رہے تھے مزید  میک اپ کرنے میں مصروف تھی۔ریت مٹی کنکر گریول اور نوکیلے سنگریزوں سے بھر پور راستہ تھا۔ایک جگہ ایسی خاک نما باریک مٹی تھی کہ  نیچےاترنے پر پیر ٹخنوں سے اوپر تک  اس میں گھس گئے اور لگا کہ جلتے تندور میں چلے گئے ہیں۔سب لوگ بھاگ کر دور ہوئے۔ ایک صاحب کی چپل اس میں رہ گئی جو بھاگنے کی بنا پر نہیں ملی۔دوبارہ کسی کی ہمت نہیں ہو رہی کہ  اس گرم ریت میں جاکر گاڑی کو دھکا لگائے۔ڈرائیور شور مچائے کہ چلو دھکا لگاؤ کوئی تیار نہیں۔وہ اکیلا ہی کبھی آگَ بھی پیچھے کے گیئر ڈال کر کوشش کرتا رہا۔ناکام رہا۔ اس نے جلدی سے نیچے اتر کر پیچھے  سے دری نکال کر اسے سائیڈ میں بچھایا اور کہا کہ اب اس پر کھڑے ہو کر دھکا لگاؤ۔دری کو آگے کرتے گئے اور گاڑی کو دھکا لگاتے گئے۔راستے میں دو ندیاں آئیں ۔جن میں کپڑوں سمیت نہا کر ٹھنڈے ہوئے اور آگے چلے۔ ایک اور  خشک ندی میں گریول  سے گزرتے میں گاڑی کا ایکسل ٹوٹ گیا۔دھکا لگا کر گاڑی ندی کے پار ایک پہاڑی کے دامن میں کھڑی کی۔

اب کوئی امید اس گاڑی کے چلنے کی تو تھی ہی نہیں۔دری نکال کر بچھائی اورغور کرنے بیٹھے کہ کیا کیا جائے۔یہ بھی نہیں معلوم تھا کہ مزار شریف کتنی دور ہے۔شام ہو چکی تھی اور رات سر پر تھی۔ایک صاحب کو ایک بچھو نظر آگیا۔اب تو سب کی سٹی گم کہ اس علاقے میں تو بچھو ہیں۔سب دری چھوڑ کر گاڑی میں آ بیٹھے۔کچھ سمجھ نہیں آرہا کہ  اب کیا کریں۔دور دور تک آدم  نہ آدم زاد۔ میرا بھی یہ لڑکپن کا زمانہ تھا۔ اسکاؤٹنگ کا سامان میں بہاولپور ہی چھوڑ آیا تھا۔کسی کے پاس کوئی ٹارچ نہیں تھی۔ایک کی چپل ریت میں  گم ہو گئی تو   ایک آدمی کی چپل دھکے لگانے میں ٹوٹ گئی۔فلمی ہیروز کی نقل کرنا اس زمانے میں میرا خیال ہے کہ آج سے زیادہ تھا۔ہمارے ہیرو وحید مراد اور ندیم دونوں نے  پتلون کے ساتھ ہوائی چپل پہن کر اداکاری کیا کی کہ سارا  نوجوان طبقہ پتلے پائنچوں کی ٹیڈی پتلون کے ساتھ ہوائی چپل پہننے لگا۔سویلو کی ہوائی چپل آٹھ روپے جوڑی تھی ۔سو ہم سب بھی ہوائی چپل میں تھے ۔  بھلا جنگل اور پہاڑیوں میں  چپل پہنی جاتی ہے اور وہ  بھی ہوائی چپل۔

اب پارٹی میں تفرقہ شروع ہوگیا کہ ہاری ہوئی ٹیم کے کھلاڑی ہمیشہ آپس میں لڑتے ہیں۔ کچھ ڈرائیور کو کچھ کچھ کہہ رہے ہیں کچھ ایک دوسرے کو کچھ کچھ کہہ رہے ہیں۔لڑ جھگڑ کر کچھ تو طے کرنا ہی تھا۔اتنے میں ایک اونٹ والا کہیں سے آگیا۔اس سے پوچھا کہ مزار کہاں ہے۔ اس نے کہا کہ بس یہ پہاڑ جہاں ختم ہوتا ہے اس کے آگے ایک خشک ندی ہے اس سے سیدھی جانب چلے جاؤ  وہاں سے پہاڑی کے ساتھ ساتھ چلے جاؤ آگے کھجوروں کے پاس  چراغ جل رہا ہوگا وہی مزار ہے۔زیادہ دورنہیں ہے تھوڑا ہی ہے۔دو آدمیوں کو گاڑی پر چھوڑا کہ ان کے پاس چپلیں نہیں تھیں اور ننگے پاؤں بچھو کا ڈر تھا۔  ایک بچھو کیا نظر آیا تھا سب کے دماغ میں بچھو بھر گئے تھے۔باقی آدمی نیاز پکانے کے چاول بکرا  اور دیگر سامان ساتھ لے کر  اندھیرے  میں پہاڑ کے ساتھ ساتھ چل دئیے،ان میں میں بھی تھا۔اس دور میں پانی کی یہ بوتلیں جو آج ہر گھر میں کولڈ ڈرنک کی رکھی نظر آتی ہیں  ان کا نام نشان تک نہ تھا۔ پانی یا تو مشک میں لے جا سکتے تھے یا شیشے کی بوتل یا تھرماس میں۔آج کی طرح نہیں کہ بوتل اٹھائی اور چل دئیے۔ اندھیرے میں اونٹ والے کے بتائے ہوئے راستے پر چل دئیے اور بھٹک گئے۔نہ کہیں ندی نظر آئی نہ کھجوریں نہ چراغ۔چلتے چلتے آدھی سے زیادہ رات ہو گئی۔ ہوائی چپلوں میں ببول کے کانٹے  چپل کے پار ہو کر پیر میں چبھ رہے تھے اور  ہر کانٹا بچھو  کاٹے سے کم نہ تھا۔ اس دور میں جنگلی حیات کی بھرمار تھی۔ کہیں سے گیدڑ تو کہیں سے بھیڑیوں تو کہیں سے کسی اور جانور کی آوازیں ہمارے اوسان خطا کرنے کو کافی تھیں۔ پتوں پرچوہے کے دوڑنے کی آواز بھی لگتا تھا بھیڑئیے کے  آنے کی ہے۔ بچھوؤں کا خوف الگ۔ ایک صاحب نے کہہ دیا کہ بکرا ساتھ ہے اسے دیکھ کر بھیڑئیے پیچھا کر رہے ہیں۔بس سب کی جان نکل گئی کہ واقعی ایسا ہی ہے۔  دو گدھے آرہے تھے   جن  کوہم  سوّر سمجھے۔ ہم بھاگ لئے۔جس نے بکرا پکڑا ہوا تھا وہ بکرے کو گالیاں دے رہا کہ کمبخت بھاگ ابے بھاگ سور تجھے تو ماریں گے مجھے کیوں مروارہا ہے۔ زبردستی کی تو بکرا دھڑام سے نیچے جا پڑا۔ وہ اسے اٹھا کر دوڑے۔ وہ تو ہمیں بھاگتا دیکھ کر  نمعلوم کیوں وہ ڈھینچوں ڈھینچوں کرنے لگے تو جان میں جان آئی۔  گدھے کی ڈھینچوں زندگی میں پہلی مرتبہ بلبل کی آواز سے بھی بھلی لگی۔ایک سمجھدار نے مشورہ دیا کہ یہ گدھے اپنے گھر جارہے ہونگے ان کے پیچھے چلیں  تو کسی بستی میں پہنچ جائیں گے۔اب زندگی میں یہ وقت بھی دیکھنا تھا کہ گدھے کو  رہنما بنانا پڑا۔ یہ تو اس واقعے کے پچاس سال بعد پتہ چلا کہ رہنما تو ہوتے ہی گدھے ہیں۔بہر حال چپکے چپکے ان کے پیچھے چل پڑے۔چلتے چلتے  دو گھنٹے بعد وہ گدھے ہمیں ایک جھونپڑی پر لے گئے۔جو اندر سےبند تھی۔جھانکا تو ایک شخص سو رہا تھا۔بہت آوازیں دیں تو اندر سے بلوچی میں آواز آئی کہ  کون ہے۔بتایا کہ مسافر ہیں راستہ بھول گئے ہیں۔  بندہ باہر آیا اور ہماری معصوم شکلیں دیکھ ہمیں بٹھایا۔پانی پلایا ۔ اپنی داستان سنائی اور کچھ کھانے کو مانگا ۔  چائے کو کہا تو کہنے لگا  راشن ہے یابس پچھلے سال کی رمضان کی کھجوریں پڑی ہیں۔اس  کا کنستر اس نے ہمیں دے دیا۔ یہ کھجوریں کیا تھیں ،کھجوروں کو کنستر میں ڈال کر کو ٹ کوٹ کر پیک کیا ہوا تھابس تلے میں لگی ایک کلو ہونگی ۔ ان میں سرسریاں  گھوم رہی تھیں  جو ہم نے ہٹا ہٹا کر کھائیں۔چینی پتی تھی  جس سے اس نے قہوہ بناکر دیا وہ پی کر  ہم چٹائیوں پرلیٹ گئے۔ بکرے نے  میں میں کرنا شروع  کر دیا ،شائد بھوکا تھا۔اب ایسے  اندھیرے میں اسے کہاں سے گھاس لا کر دیتے۔اس کی آواز بڑھتی گئی۔کم بخت ایسے ڈکار رہا تھا جیسے اس کے گلے پر کوئی چھری پھیر رہا ہو۔ایک تو ہم ویسے ہی پریشان اوپر سے میں میں کا مستقل عذاب۔کمبخت کو قتل کرنے کا دل چاہ رہا تھا۔اس آدمی نے بتایا کہ  ہم گدھوں کے پیچھے لگ کر   مزار کے راستے سے بہت دور نکل آئے تھے۔ابھی اندھیرا ہی تھا کہ ایک شتر سوار کہیں سے اس  دکاندار کے پاس آگیا۔ نمعلوم بلوچی میں کیا خبر سنائی کہ  وہ ہمیں مزار کا راستہ بتا کر  جلدی میں  اونٹ پر بیٹھا اور  چلا گیا۔ہمارے بلوچ نے بتایا کہ کسی  بڑےسردار کا  ان کے علاقے بیلہ میں جلسہ ہے اور پورا علاقہ اس جلسے میں گیاہوا ہے ۔یہ بھی وہیں گیا ہے۔

صبح ہو گئی ہم لیٹے رہے اس امید پر کہ  کوئی تو اس دکان پر آئے گا  اس سے راستہ پوچھ لیں گے۔کوئی نہیں آیا۔ وہ اندھیرے میں نمعلوم کیا کیا بتا کر چلا گیا تھا۔جب دن کے نو بج گئے تو طے کیا کہ   جدھر بتایا ہے ادھر چلتے ہیں کوئی اللہ کا بندہ تو ملے گا۔ہمیں جن دو  آدمیوں کو گاڑی پر  بھوکا پیاسا چھوڑ آئے تھے ان کی بھی فکر تھی ۔بکرےکو لے کرچلے۔ بھٹکتے بھٹکتے نمعلوم کدھر جا رہے تھے کہ  دو خواتین نظر آئیں۔ان سے پوچھا کہ مزار کدھر ہے  انہوں نے  ایک جانب اشارہ کیا اور ہم اس راستے پر چل دئیے۔راستے میں ایک ندی آئی اس میں سے پانی پیا ۔دوپہر ہو گئی تھی اور ناشتےکھانے کا پتہ نہ تھا۔بکرے نے بھی پانی پیا  اور ایک لمبی میں میں ایں ایں کے ساتھ دھڑام سے زمین پر گر گیا۔منہ کھل گیا آنکھیں باہر آرہی تھیں۔لگتا تھا آخری وقت  تھا  اس بیچارےکا بلکہ   کمبخت کا ،کیونکہ اس کے بخت ہمارے ساتھ جو نتھی تھے۔۔اللہ جانے مر گیا تھا یا عالم نزاع میں تھا۔۔میں اس دور میں اپنے آپ کو ٹارزن سمجھتاتھا۔اسی لئے وزیر آباد کا چھ آنے والا چاقو جس پر لکھا تھا چاقو قلم پنسل نہ بنائے تو قیمت واپس ہمیشہ ساتھ رکھتا تھا۔ ابا کے ساتھ  پنڈی  جاتے میں  ٹرین کے پھیری والے سے خریدا تھا ۔قاسم بلوچ  کے کہنے پر میں نے  اپنا ٹارزن چاقو نکالا اور بکرے کی گردن پر  پھیر دیا۔آج یہ ٹارزن چاقو  کام آ ہی  آگیا۔ ۔مالک کی گھبراہٹ دیکھئیے کہ بکرا لے آئے اور چھریاں سوزوکی میں چھوڑ آئے۔ گردن کاٹ دی  خون نہ  نکلا۔بکرے کی باڈی دبا دبا کر چند بوند خون نکال ہی دیا اس طرح اس کے حلال ہونے کی شرط پوری کر دی۔سب نے اپنی اپنی رائے دی کہ زندہ تھا جبھی تو خون نکلا۔حلا ل ہے، حلال ہے ،صحیح ہے صحیح ہے،اللہ کا شکر ہے حرام موت سے بچ گیا وغیرہ غیرہ۔اسی چاقو سے اس کی کھال اتاری۔ دس بار اسے پتھروں پر تیز کیا  تب جاکر کھال اتاری۔اس کا اوجھڑی پوٹا پھینکا،کلیجی وغیرہ ایک رومال میں باندھی،میری دھوتی گیلی کر کے اس بکرے کے گوشت کے گرد لپیٹ دی گئی۔اب پھر یہ قافلہ چلا۔تھوڑی دور چلے ہونگے کہ ایک نے مشورہ دیا سارا سامان ساتھ ہے۔پیچھے ندی میں  پانی بھی ہے۔لکڑیاں بھی جنگل میں ہیں ۔یہیں پکا لیں اپنا حصہ کھا لیتے ہیں نیاز کا مزار پر بانٹ دیں گے۔واپس ہوئے۔ابھی تیاری شروع کی تھی کہ ایک بندہ  کہیں سے اونٹ پر آ گیا۔اس سے مزار کا راستہ پوچھا اس نے کہا بس نزدیک ہی ہے۔یہ پہاڑ کے پیچھے ہے ۔ اس نے ہمارا سارا سامان گوشت  سمیت اونٹ پر باندھا اور ہمارے ساتھ چل دیا۔

آخر کار اس نے ہمیں مزار پر پہنچا دیا ۔لیکن یہ وہ مزار نہیں تھا جس پر ہمیں جانا تھا۔جس پر جانا تھا اس کا نام تھاپیر کنانواور یہ تھا گم نام۔ ایک قبر بنی ہوئی تھی ایک بڑا سا درخت اس پر ایسے تھا کہ دس پندرہ آدمی اس کے سائے میں بیٹھ سکیں۔اس پر بابا آدم کے زمانے کی ایک ہری چادر پڑی تھی۔اونٹ والا اتنی ہی زبان سمجھا کہ ہمیں کسی تربت پر جانا ہے۔ہمارا بلوچ تو بس واجبی سی بلوچی جانتا تھا اور یہ علاقہ کسی اور طرح کی بلوچی بولنے والوں کا تھا۔ اس نے نزدیکی تربت پر پہنچا دیا۔شکر ہے کہ اس مزار کے نزدیک ایک چھوٹا سا پانی کا چشمہ تھا۔اس کے پاس کلہاڑی تھی جس سے اس نے ہمارے بکرے کا گوشت بنا دیا ۔اس نے یہ بتا دیا کہ پیر کنانا یہاں سے بہت دور چار گھنٹے کی مسافت پر ہے۔ اور بیلہ یہاں سے دو گھنٹے کے فاصلے پر ہے۔بیلہ کا راستہ بھی بتا دیا۔ وہ ہمیں یہاں پہنچا کر  اپنے راستے پر چل دیا ۔ ہم نے یہیں نیاز کرنے کا فیصلہ کیا۔بکرے کی بریانی پکائی۔ کوئی دوسرا نہیں آیا خود ہی کھائی۔شام ہو رہی تھی اور پارٹی میں خوب لڑائی جھگڑا ہو رہا تھا۔کسی کو کچھ سمجھ نہیں آرہا تھا کہ کدھر جائیں اور کیا کریں۔چند بچے بکری چرانے والے گزرے۔انہیں اردو نہیں آتی تھی اور ہمارے بلوچ کو ان کی بلوچی نہیں آتی تھی۔بچے براہوی زبان بول رہے تھے۔اتنا سمجھ گئے کہ اپنے کسی بڑے کو بھیج دیں۔بچے چلے گئے۔ہمیں فکر اپنے ان دو ساتھیوں کی تھی جو سوزوکی میں تھے۔انہیں چھوڑے ہوئے چوبیس گھنٹے سے زیادہ ہو چکے تھے۔اب پھر رات ہونے والی تھی۔ہم ان بچوں کے بڑوں کا  انتظار کر رہے تھے جو کسی طرح پورا ہوتا نظر نہیں آرہا تھا۔درختوں اور پہاڑیوں  میں  دور جاتا کتّا یا گیدڑ بھی ہمیں بھیڑیا معلوم ہوتا تھا۔اس میں کوئی شک نہیں کہ بھیڑئیے اس زمانے سے اب تک اس علاقے میں پائے جاتے ہیں۔انسانوں پر حملے کے بھی جھوٹے سچے قصے سن رکھے تھے۔اس لئے خوف بھی تھا۔ واحد ہتھیار  بس میرا ٹارزن چاقو تھاجو گوشت کاٹنے کے دوران اپنی کمر تڑا بیٹھا تھا۔اب ہم میں سے دو کی ہوائی چپل بھی۔کپڑے سے باندھ کر چلائی جا رہی تھیں۔رات ہو گئی کوئی نہیں آیا۔بیلہ والے راستے پر چل دئیے۔ان علاقوں میں مغرب کے بعد سب اپنے گھروں میں ہوتے ہیں۔اب تو کسی کے ملنے کا بھی آسرا نہ تھا ۔جنگل کے راستے ایسے ہی ہوتے ہیں کہ  جو جانتا ہے وہی ان پر جاسکتا ہے۔جہاں ایک سے دو راستے ہوئے اور نیا آدمی پریشان ہوا۔ان راستوں میں بھٹک کر بھوک  پیاس سے لوگ ہلاک ہو جاتے ہیں۔جس قبر پر ہم نے کھانا پکایا تھا وہ بھی کسی ایسے ہی بھٹکے ہوئے مسافر کی تھی جسے مقامیوں نے دفن کر دیا تھا۔اسی لئے اس کا کوئی نام نہیں تھا۔ہمارا بھٹکنا لازمی تھا۔راستے سے  لکڑیاں توڑ کر ڈنڈے بطور ہتھیار بنا لئے تھے۔آدھی رات تک چلتے رہے پیاس سے برا حال۔کوئی پانی نہیں۔ایک جگہ تنگ آکر بیٹھ گئے۔بچا ہوا کھانا کھا لیا۔بغیر پانی کے کھانا اندر نہیں جا رہا تھا۔ایک نے مشورہ دیا کہ  الاؤ جلا لو جنگلی جانوروں سے بچت ہو جائے گی اور شائد کوئی روشنی دیکھ کر ہماری طرف آجائے۔

ساری ترکیبیں ناکام ہو گئیں۔ رات بھر کوئی نہیں آیا۔یا اللہ جائیں تو کہاں جائیں۔پیاس سے برے حال کی وجہ سے ایک صاحب نے تو چلنے سے انکار کر دیا۔کہ وہ  کہنے لگے کہ میں ایک قدم نہیں چل سکتا۔آپ لوگ جہاں مرضی آئے جائیں۔میں یہیں مروں گا۔ رات سے وہ خاموش تھے ہم سمجھے کہ یونہی خاموش ہیں ۔اب اندازہ ہوا کہ ان میں پانی کی کمی ہو گئی ہے اور ان کی حالت بہت زیادہ خراب ہے۔طے ہو اکہ ارد گرد پانی ڈھونڈا جائے۔پہاڑ پر چڑھ کر ادھر ادھر دیکھا۔ ایک سوکھی ندی نظر ائی۔دو آدمیوں کو ادھر بھیجا  پتیلا دے کر کہ ندی میں چلتے جانا کہیں نہ کہیں پانی مل جائے گا پانی لے کر واپس  آجانا ۔وہ جلد ہی پانی لے کر واپس آگئے۔سب نے پیا اور ان صاحب کی حالت بھی ٹھیک ہو گئی۔ایک بکری چرانے والا بھی ندی سے آتا ہوا نظر آیا۔اس سے ملاقات ہوئی ۔اس نے بتایا کہ تم لوگوں کو توپوری بیلہ پولیس  اور سردار تلاش کر رہے ہیں۔کل تمہارے دو آدمیوں کے ساتھ پولیس والے آئے تھے اور تم لوگوں کو پوچھ رہے تھے۔۔پھر سردار کے آدمی بھی آئے تھے وہ بھی پوچھ کر پیر کنانو کی طرف گئے ہیں۔اب ہماری جان میں جان آئی کہ  ہم بھٹک کر نہیں مریں گے لوگ ہماری تلاش میں ہیں۔اس کو ہم نے بتایا کہ ہم نے  کل سے کچھ نہیں کھایا۔ہماری مدد کرے۔ وہ ہمیں اپنے گھر لے گیا۔وہاں چند گھر تھے۔ان سب نے مل کر ہمارے لئے کھانے کا بندو بست کیا۔بکرا کاٹ کر پکایا اور گرم گرم روٹیاں پکا کر لائے۔ایک آدمی کو اونٹ پر روانہ کیا کہ وہ سردار کو ہماری خبر کرے۔

شام چار بجے کے قریب تین جیپوں میں ہمارے دونوں آدمی، سردار  اور اس کے آدمی  اور پولیس والے   ہمارے پاس آئے۔ان کے ساتھ ایک ڈاکٹر اور کمپاؤنڈر بھی تھا۔یہ  ریسکیو ٹیم تھی جو ہمیں تلاش کر رہی تھی۔ڈاکٹر نے ہمارا حال  پوچھا چیک کیا سب کو نمک چینی کا پانی پلایا۔وہاں سے ہم اپنی سوزوکی پر لےجائے گئے۔جسے باندھ کر بیلہ تک لایا گیا۔وہاں ایک مکینک کو بلا کر اسے ٹھیک کرنے کا کہا۔ہمیں چوکی پر لے گئے جہاں اور کچھ لوگ ہمیں ملنے آئے میرا خیال ہے یہ ضلعی افسران ہونگے۔جب تک گاڑی بنتی رہی ہم سب بات چیت کرتے رہے۔ہمارے بعد یہ ہوا کہ وہ دو آدمی گاڑی میں بیٹھے رہے۔پیر کنانا سے ایک جیپ آرہی تھی جو وائلڈ لائف والوں کی تھی۔ ان دونوں نے ان کو اپنی کہانی سنائی اور کہا کہ ہمارے آدمی پیر کنانا گئے ہوئے ہیں۔ابھی تک نہیں آئے۔ہم بھی کل سے بھوکے پیاسے ہیں۔انہوں نے کہا کہ ہم تو وہیں سے آرہے ہیں وہاں تو کوئی نہیں۔وہ انہیں اپنے ساتھ بیلہ لائے۔کھلایا پلایا اور پولیس کو اطلاع دے دی کہ کچھ زائرین گم شدہ ہیں۔انہوں نے وائرلیس  پر  سردار کی سکیوریٹی چوکی پر اطلاع دی۔اور سرچ آپریشن شروع کر دیا۔کل سارا دن یہ ہمیں ڈھونڈتے رہے۔ہم بالکل ہی غلط ٹریک پر تھے۔مزار اگر شمال کی جانب تھا تو ہم جنوب کی جانب جا رہے تھے۔ان لوگوں نے لیمارکیٹ جانے والی بس کے ڈرائیور سے گھر والوں کو پیغام  بھی بھجوا دیا تھا کہ گاڑی خراب ہوگئی ہے ایک دن دیر سے آئیں گے۔

سردار نے کہا جب بھی مزار پر جانا ہو جیپ میں جانا اگر جیپ کا بندوبست  نہ ہو تو میرے پاس آجانا جیپ دے دونگا۔یہ راستہ سوزوکی کے قابل نہیں ہے۔ پہلے کچھ ٹھیک تھا اب تو بہت خراب راستہ ہو گیا ہے۔گاڑی ٹھیک ہوئی سردار اور پولیس آفیسر نے ہمیں  دعائیں دے کر خدا حافظ کہا۔نہ گاڑی ٹھیک کرنے کے اور نہ ٹینک فل کرنے کے کوئی چارجز لئے۔ وہاں سے چلے اور آدھی رات کو لیمارکیٹ  قاسم بلوچ کے گھر پہنچے۔قاسم بلوچ نے مجھے نالے پر گرم گرم چھوٹے کے پائے نان کھلائے،جمعہ پائے والا مشہور تھا چوبیس گھنٹے پائے ملتے تھے۔پائے کھا کر دو دودھ پتی کا آرڈر دیا۔اسے خدا حافظ کہا۔اپنی سائیکل اٹھائی۔اس کی سیل والی لائیٹ جلائی اور گانے گاتا ہوا ناظم آباد میں اپنے فلیٹ پر پہنچ  گیا۔اکیلا رہتا تھا میرا کون منتظر تھا جو کوئی فکر ہوتی ۔اب جو سویا  تو شام کو جب اٹھا جب فلیٹ کے نیچے والا محفوظ الرحمان بنگالی کٹا کٹ مچھلی فروش بنگال سے آئے ہوئے  ناریل تحفے میں دینے اوپر آیا۔آج جب نصف صدی بعد پیر کنانا اپنی بائیک پر گیا تویہ نام بھی یاد آگیا اور ساری کہانی کی یادیں بھی تازہ ہو گئیں۔مرحوم قاسم بلوچ بھی یادآگیا۔

ہالیجی جھیل اور ایرانی طلباء

ہالیجی جھیل اور ایرانی طلباء

رانا عثمان صاحب نےراکاپوشی ٹریک پر دو سیّاحوں کی انڈوں اور چائے سے خدمت کرنے پر ایک سند قبولیت پاکستان اور پاکستانیوں کے لئے حاصل کی۔ جس کی بے حد خوشی ہے۔اس پر اس بندہ بشر کو بھی ایک چالیس سال پرانی آپ بیتی یاد آگئی جو آپ لوگوں سے بانٹنا چاہوں گا۔یہ سن 1975 کی بات ہے کہ محلّے کے پانچ آوارہ سے دوستوں کے ساتھ  ہالیجی جھیل جانے کا پروگرام بنا۔ اس وقت ان میں یہ بندہ ہی ایک سینئر تھا 28 برس کا باقی سب چھوٹے یعنی ٹین ایج کے تھے۔ایک تھے ان میں اسلم باورچی۔ انہوں نے ہالے جی جانے کے لئے جن لوگوں کا بھی کھانا اس دن پکایاتھا اس میں سے شیر مال اور قورمہ ماردیا اور ہمارے مزے آگئے۔اس کھانے کو ایک پتیلے میں رکھ کر کپڑے سے باندھ دیا۔بس نمبر ون ڈی میں اورنگی سے تین ہٹی  جانے کے لئے یہ کھانا بس کے اندر فرش پر رکھ دیا۔ ایک صاحب نے اس کو پیر سے پیچھے کو کر دیا۔اسلم نے کہا کیا کرتے ہو بھائی اس میں کھانا ہے۔ اس پر انہوں نے ایک اور لات کھانے کو ماری اور کہا کہ اسے  راستے سے ادھر کرونا۔اسلم کا پارہ چڑھ گیا اس نے ان صاحب کو دو چار زور دار قسم کے جھانپڑ رکھ دئیے۔ وہ  پِٹ کر آگے بڑھے اور لگے اول فول بکنے اسلم کو۔ وہاں ہمارے جناب کمال صاحب  کھڑے تھے دو انہوں نے رسید کر دئیے ۔ وہ بک بک کرتے اور آگے آگئے ۔دیکھئے بڑوں کی کوئی عزت نہیں،سالے ٹکے ٹکے کے چھوکرے  ہیں بس میں بدمعاشی مچا رہے ہیں اور کوئی پوچھنےوالا نہیں ۔میں یوں کر دونگا  ووں کر دونگا لالو کھیت آنے دو۔ اب وہ  کمال سے آگے آچکے تھے اور ان کی زبان تمام حدود پار کر رہی تھی۔اتنے میں جمال صاحب کا ایک زور دار دھماکے دار تھپڑ پڑا ساتھ میں آواز ائی کہ چپ ہوتا ہے یا نہیں ۔اور آگے آئے تو محفوظ بھائی نے بھی دو ہاتھ رکھ دئے کہا کہ اسلم چھرا نکال کے لا ۔ وہ سب سے پٹتے بچتے خواتین کے حصے کے دروازے کے پاس جہاں میں کھڑا تھا تشریف لے آئے۔مجھے مخاطب کر کے کہنے لگے دیکھا آپ نے۔میں نے عرض کیا کہ کیا آپ کی ابھی تسلی نہیں ہوئی۔خاموشی اچھی چیز ہے۔اب چپ ہو جائیے میں بھی ان کا ساتھی ہوں۔ایسا نہ ہو کہ مجھے بھی کوئی ایکشن لینا پڑے۔  بیچارے لاھول ولا پڑھتے ہوئے  خواتین کے دروازے سے نیچے اتر گئے۔

                ہالے جی میں جاتے ہی مچھلی لگنی شروع ہو گئی۔ ایک پاؤ سے ڈیڑھ کلو تک کی سول مچھلی لگ رہی تھی۔سب نے جی بھر کر ماری۔شام ہو گئی۔ہمیں وہاں رات گزارنی تھی۔شام ہوئی۔اب مچھلی کا کیا کریں۔کمال سب سے چرب زبان تھا۔ ایک بوری پر ساری رکھ کر سجا کر اسے فروخت کرنے کا کام دےدیا۔ اس نے دو مچھلیاں تین ر وپے کی بیچ دیں،پھر پانچ کے تین روپے۔کوئی ایک ہی تین روپے کی۔ عرف عام میں جیسا منہ ویسا تھپڑ ۔جیسا گاہک دیکھا بس بیچ دیں جان چھڑانی تھی۔ غرض آدھی مچھلیاں بک گئیں۔ابھی بھی بیس کلو  کے قریب باقی تھیں۔میرے مشورے پر ان کو تل کر رکھنا بہتر تھا ورنہ خراب ہو جاتیں۔صفائی کی،کڑھائی چولہے پر  چڑھائی اور عمر مرحوم نے تلنا شروع کیا۔دو پرانی پیٹیوں پر اخبار بچھا کر مچھلیاں تل کر رکھنی شروع کیں گرم گرم تھی کھاتے بھی گئے۔ بہت دلنشیں بلکہ ناک نشیں خوشبو دور دور تک پھیل رہی تھی۔

                اس وقت بھٹو صاحب کی حکومت تھی اور سعودیہ کےشاہ فیصل،ایران کے شہنشاہ آریہ مہر،کیوبا کے کاسترو، یوگنڈا کے عیدی امین،مصر کے جمال ناصر ،لیبیا کے معمر قذافی انڈونیشیا کے سوئیکارنو ہمارے  گہرے اور سچےدوست تھے ۔ ایران سے ہمارے تعلقات بہت اچھے تھے ۔بھٹو صاحب ایران کے داماد تھے۔ کراچی یونیورسٹی میں ایرانی طالبعلموں کی بڑی تعداد  زیرتعلیم تھی۔ایک بس ایرانی طالبعلموں کی خوشبو سونگھ کر رک گئی۔ تازہ مچھلی کی بات ہی کچھ اور ہوتی ہے۔مجھ سے پوچھا کہ بیچتے ہو۔ میں نے کہا کہ ہاں۔بھاؤ بتاؤ۔میں نے کہا کہ بہت سستی ہے خوب کھاؤ۔ کوئی پچاس طلباء تھے۔ وہ اپنی طرف سے شرارت کر کے کھا رہے تھے۔آپس میں باتیں کر رہےتھے کہ  کوئی تولنے کی چیز تو ہے نہیں۔وزن کم بتائیں گے اور کم پیسے دیں گے۔ فارسی زبان میں جو کچھ انہوں نے آپس میں کہا ان کی باڈی لینگویج اور لینگویج سے کچھ کچھ سمجھ آرہی تھی۔میں نے انہیں اٹھا اٹھا کر گرم گرم مچھلی دی۔ سب کو کھلائی،خوب کھلائی۔ہمیں تو جان چھڑانی تھی۔ہم تو پہلے ہی کھا کھا کر تنگ آچکے  تھے۔لگ بھگ ساری مچھلی وہ کھا گئے۔ اب انہوں نے قیمت پوچھی۔اردو  وہ کم جانتے تھے۔ میں نے  انگریزی میں کہا کہ میں خود یونیورسٹی کا طالبعلم ہوں۔آپ لوگ میرے یونیورسٹی کے ساتھی ہیں۔ ہم لوگ دکاندار نہیں شکاری ہیں، عید کے موقع پر سیرو شکار پر آئے ہیں اور آپ ہمارے ایرانی بھائی ہیں۔ ہم پیسے نہیں لیں گے۔ اس پر وہ بہت ہی خوش ہوئے۔

                اب انہوں نےکیا کیا۔ایک پیٹی آم ،آدھی پیٹی انگور،کوئی تیس شیرمال،دس برگر اور نامعلوم کیا کیا بس سے اتار کر ہمیں دے گئے۔لاکھ منع کیا لیکن بس برادر برادر کر کے چلے گئے اس دور میں برگر کوئی عام کھانا نہ تھا ایسا تھا جیسے آج پیزا۔ برگر فیملی نام اسی لئے ہے کہ پہلے عام آدمی کی پہنچ سے برگر باہر تھا۔پہلے تو ہم مچھلی سے تنگ تھے۔اب ان چیزوں سے تنگ ہو گئے۔دن بھر سے کھا کھا کر پہلے ہی پیٹ بھرے تھے اور کیا کھاتے۔کچھ کل کے لئے رکھ کر باقی مقامی بچوں میں بانٹ کر جان چھڑائی۔رات تاش کھیل کر اور شمشاد بیگم کے گانے سن کر کچھ سو کر گزاری۔ پروگرام یہ ہوا کہ صبح سویرے شکار کریں گے دو یا تین گھنٹے اور گھر کے لئے تھوڑی تھوڑی  مچھلی مار کر جلدی نکل جائیں گے۔لیکن لگتا ہے  لالو کھیت کےپٹے ہوئے مسافر کی بددعا لگ گئی۔وہی پانی، وہی ہوا، وہی چارہ،وہی گھاٹ ،وہی بادل وہی ہم اور وہی ڈور کانٹےبہ زبانِ شاعر، عہ،

ہے یہ وہی آسماں اور ہے وہی زمیں ۔پر میری تقدیر کا یہ وہ زمانہ نہیں

۔ شام ہو گئی۔ایک مچھلی نہ لگ کر دی۔دوپہر کو بخشش کا دیا ہواکھانا کھایا اور لوٹ کے بدھو ، پانچ میل پیدل پھر بس ،گھر کو آئے۔

                عمرصاحب کا دس سال پہلے انتقال ہو چکا،جمال صاحب ہیروئن  پی  پی کرمر گئے،اسلم کا اپنا پکوان سنٹر ہے جسے بچے چلاتے ہیں وہ اپنے ڈیڑھ سو کلو وزن سے پریشان ہیں گھر کو ہسپتال بنایا ہوا ہے ۔محفوظ صاحب  مفلسی کی زندگی گزار رہے ہیں۔کمال صاحب بزنس میں ایسے مصروف ہیں کہ ماربل کی مائنز سے بمشکل وقت نکال کر بچوں سے ملنے آتے ہیں۔کراچی یونیورسٹی میں اب کوئی ایرانی طالبعلم نہیں ۔ہالے جی جھیل ڈاکوؤں کا گڑھ بن چکی۔ جھیل میں سول مچھلی تو کجا اب مینڈک بھی نہیں پائے جاتے۔بندہ اُس وقت پانچ میل  پیدل چل کر مین روڈ سے اندر ہالے جی جاتا تھا اب پیدل باتھ روم کے علاوہ کہیں نہیں جاتا۔

                آہ کیا لاپرواہی اور فرصت کے دن تھے جو ہوا ہو گئے۔

شمیم الدین غوری کے لیپ ٹاپ سے ایک تحریر

چڑیل کی بیٹی

چڑیل کی بیٹی

گھرمیں تیاری ہو رہی تھی کہ میرے ابّا آرہے ہیں۔انکے لئےنئی چارپائی اور بستر تیار کیاگیا۔ولایت سے چار سال بعد آرہے تھے  ۔میں اس وقت پانچ سال کا ہونگا ۔آخر کار دوپہر کو دادا جاکر انہیں لے آئے۔ابا کے ساتھ ایک لڑکی تھی ۔سنہرے بالوں والی اور نیلی آنکھوں والی۔گھر میں میرے علاوہ کوئی بچہ نہ تھا ۔ ابا نے کہا کہ بیٹا یہ تمہاری بہن ہے۔اسے انگریزی میں بتایا کہ یہ تمہارا بھائی ہے۔وہ میری ہم عمر ہی تھی یا کچھ بڑی تھی۔وہ برادر برادر کہہ کر  مجھے پیار کرنے  لگی ۔ ہم کھانا کھا کر شام تک اکٹھے کھیلتے رہے۔ اس نے مجھے ایک تصویروں والی بہت اچھی گتے نما صفحوں والی  کتاب تحفے میں دی۔ اسے اردو اور مجھے انگریزی نہیں آتی تھی۔لیکن آپس میں ہم کئی گھنٹےبات کرتے رہے۔ اس نے مجھے اپنا ایک فوٹو بھی دیاجو اس  نے اپنے  ا سکول کے لئے کھنچوایا تھا۔اس میں وہ  بالکل پری لگ رہی تھی۔

رات کے کھانے کے بعد امی اور ابو میں لڑائی ہوتی رہی۔ہوتی ہی رہی جب تک ہم دونوں سو نہ گئے ہمیں ان کے لڑنےکی آوازیں  آتی ہی رہیں۔جب میں صبح اٹھا تو ابو اور  میری بہن گھر میں موجود نہیں تھے۔میں نے امی سے پوچھا کہ ابو کہاں گئے۔انہوں نے کوئی جواب نہیں دیا۔میں نے کہا کہ انہوں نے سائیکل دلانے کا وعدہ کیا تھا لینے گئے ہونگے۔میرے بستر پر وہ کتاب رکھی تھی اور اس میں وہ تصویر۔میں  تصویر نکال کر دیکھنے لگا اور امی سے پوچھا کہ امی یہ کون ہے اتنے پیارے سنہری بالوں والی لڑکی؟ امی نے وہ تصویر  میرے ہاتھ سے لی اور کہا کہ یہ چڑیل کی  لڑکی ہے۔ چڑیل ہے  دور کرو اسے یہ تمہیں کھاجائے گی۔تصویر کے چار ٹکڑے کئے اورز مین پر پھینک دئے۔میں نے انہیں اٹھایا اور  اس کتاب میں رکھ کر اسکول چلا گیا۔

واپس آکر اس کتاب میں سے تصویر کے ٹکڑ ےنکال کر   جوڑا اور اسے کتاب میں رکھ کر کتاب چھپا دی کہ کہیں امی کی نظر نہ پڑ جائے۔کچھ دنوں بعد  ایک آدمی ایک بہترین چمکدار سائیکل لے کر آیا اور دادا جان سے میرا نام پوچھ کر  دادا جان کے دستخط لے کر سائیکل مجھے دے کر چلا گیا۔ابا جان نے اپنا وعدہ پورا کر دیا تھا۔

وقت گزرتا رہا۔دادا دنیا چھوڑ گئے۔ابا جان نہ آئے۔ امی کے آگے تو ابا کا نام لینا قیامت تھا۔دادا بتاتے تھے کہ میرےابا نے ولایت میں شادی کی ہوئی تھی لیکن میں نے ان کی ایک نہ سنی اور یہاں شادی کر دی۔دادا کے بعد مجھے ابا جان کے بارےمیں بات کرنے کے لئے کوئی میسر نہ تھا۔امی نے میرے اسکول میں میرے باپ کے نام کے خانے میں اپنے باپ یعنی میرے نانا کا نام لکھوا دیا تھا۔امی کے مرنے کے بعد مجھے اندازہ ہوا کہ میں تو اپنے باپ کے نام سے بھی واقف نہیں ہوں۔اتہ پتہ تو کیا ملے گا نام تک معلوم نہیں۔بہن کو میں ہمیشہ یاد کرتا رہا۔ وہ تھی ہی اتنی خوبصورت کہ بھلا نہیں سکتا تھا۔

آج میری بیٹی نے اسٹور میں سے وہ کتاب نکال کر پوچھا پاپا اس اینیمل بک میں یہ کس کی تصویر ہے اتنی پیاری سنہرے بالوں والی لڑکی۔میں جواب تو کیا دیتا۔مجھے وہ دن اور وہ خوشگوار ماحول یاد آگیا ۔ اس کا وہ پیار،وہ تحفہ وہ فوٹو،وہ امی کا چڑیل کی بچی کہہ کر تصویر پھاڑ دینا۔۔وہ دن خوشگوار تھا یا منہوس کہ اس دن کے بعد نہ زندگی میں کبھی ابا جان نظر آئے اور نہ وہ سنہرے بالوں والی آپاجان۔کاش ایک بار تو مل لیتا۔ والد صاحب اور بہن سے بس وہ پہلی اور آخر ی  ملاقات تھی۔میں نے تصویر لے کر دیکھی لگتا تھا مجھے ہی دیکھ رہی ہے۔جیسے کہ رہی ہو بھائی ایسے ہوتے ہیں۔

بچپن کی پڑھی ہوئی ایک کہانی سے ماخوذ۔

شمیم الدین غوری کے لیپ ٹاپ سے